(АВ.).
Беседа первая. Предисловная
(1) Вопрос: Что есть риторика?
Ответ: Риторика есть хитрость добре глаголати.
(2) Вопрос: И что есть глаголати добре?
Ответ: Добре глаголет иже тако слово свое составляет, яко возмощи ему обрести конец или вину своего слова, до котораго конца намеряет, си есть аще кто хвалити кого хощет, конец слова его есть да в великую честь и славу в своих слышателей приведет хвалимаго. Аще убо тако изсправлено слово его есть, яко возможет намерение сие исполнити и исходатайствовати честь тому, к его же похвале слагается, добре той глаголет. Аще ли ни, не добре и не риторически.
И паки: аще кто кому советует, намерение имать привести его к делу, о нем же советует. Аще убо приведет, яве есть, яко добре глаголаше, аще ни – инако.
(3) Вопрос: Аще же кто советуяи дело греховное преклонити к тому, убо и той ли глаголет добре?
Ответ: Погрешает той на Бога, но не на правила риторическая и того ради зле глаголет по намерению и нравом, но добре по правилам слова; подобне тому, иже меч ко неправедному убиению сооружает, той бо зле творит по злому своему намерению, но аще меч искусным и нарочитым художеством устраяется, глаголется добре учинен быти, и творец той злый человек не нарицается, но добрый художник.
(4) Вопрос: Что убо хранити подобает, да толь совершенно глаголати возмогу, вестно бо есть, яко немнози суть к намеренному концу, и многа глаголюще приводят?
Ответ: На сие изобретается хитрость риторическая, содержащая в себе многия и различныя правила доброму глаголанию удобь составляющая, яже со всяким желанием испытуеши, безбедно у мене обрящеши, хотящему бо вся удобна бывают.
(5) Вопрос: Того ради и приидох к тебе, яко велие желание хитрости сея имею, мняще ю быти в житии человеческом паче иных полезнейшую.
Ответ: Аз убо краткое тебе и ясное преподам наставление, аки за руку ведуще тя, како совершенное и своего намерения не лишаемое слово составити имаши. Множайшаго же ради удобия и сам, излагающе правила во образ тых, особное некое имамь составити, да не токмо убо видиши мене учащаго, но и творящаго, и тако совершение учением сугубым, си есть словом и делом моим, наставлен будеши.
Первее убо достоит уведати многократные ли суть роди слова. Та же колико части имать слово. Потом же, на колико частей разделяется вся хитрость риторов, или кая нужная ведати ритор имать, да доброе и совершенное слово его будет.
(6) Вопрос: Повеждь убо: колики суть роди слова?
Ответ: Три.
(7) Вопрос: Кии?
Ответ: Советователный, разсудителный, украсителный.
(8) Вопрос: Что есть род советователный?
Ответ: Есть егда что кому делати советуем доброе или оставити злое.
(9) Вопрос: Что разсудителный?
Ответ: Егда разсуждаем правду от неправды или истину от лжи.
(10) Вопрос: Что украсителный?
Ответ: Егда лице или вещь некую ублажаем или похваляем.
(11) Вопрос: Не суть ли инныя роди слова?
Ответ: Ни, но в сих трех все разнствия глаголов человеческих заключаются, всяк бо человек или сам со собою в уме своем глаголет или с иным. Аще убо сам с собою, тогда истинны умом испытающе разсуждает. Аще же со иным беседует, глаголет ему, или да той что сотворит его послушаяи, или да чему уверит, некое от него мнение восприимет. Аще первое – советует; аще ли же второе, то блажит что или похуляет, и тако вся глаголы его в трех родах заключаются.
(12) Вопрос: Понеже аз желание имею в церковных проповедях искусным быти, повеждь ми, кий род слова приличен ко проповеданию.
Ответ: По вся праздники господския и памяти святых приличен есть род слова украсителный. Тогда убо похвала тайне и величиих Божию или угодников его глаголати подобает. По вся дни недели служит род слова советователный, ибо тогда нравыучение от евангелских Христовых словес почерпати и слышателей или отводити от греха или к добродетелям наставляти проповедник должен есть. Род же судителный нечасто церковным ритором случается, разве егда на изриновение лживых еритических догматов простирает слово.
(13) Вопрос: Совершенно рекл еси о родах слова. Рцы еще по обещанию твоему и о частех слова. Первее же колико имать частей слово риторическое?
Ответ: Слово всякое четырми частми составляется, яже суть первое начало или приступ к слову или предисловие; второе – предложение, овогда же повесть вместо предложения; третие – подкрепление, или утверждение; четвертое – окончение, или пословие.
(14) Вопрос: Скажи особь о коейждо части: что есть начало, что предложение, что подкрепление и что пословие?
Ответ: Начало слова есть часть слова первая, предуготовляющая проповедника ко глаголанию, слышателя ко слышанию. Предложение же есть изявление того, о нем же глаголати имать проповедник, да первое вкратце познают людие, что имать рещися. Подкрепление же есть собрание доводов и изветов, ими же слово предложенное укрепляется. Пословие же есть совершение слова, содержащее в себе сокращение вся изреченная памяти ради слышавших, к тому и слышателей ко уверению и творению конечно понуждающе.
(15) Вопрос: Не суть ли инныя к тому части слова? Ответ: Прочии риторове на множайшия части слово раз?деляти обыкоша, но вся тыя части в сих четырех, о них же беседуем, заключаются. Повесть бо, разделение и отвержение, яже от иных полагаются аки особныя части, в сих четырех нетрудно могут заключаться: повесть и разделение – в предложении, отвержение же во подкреплении вмещаются.
(16) Вопрос: Что убо есть суть новопредложенная повесть и проч.?
Ответ: Речем инде о сих, егда совершеннейшо учение о кыйждо особь части восприимем. Ныне же довлеет беседа, да немногим повествованием возмущенна будет память и мало удержати не возможет.<… >
Беседа третья. О изобретении
(1) Вопрос: Что убо изобретение есть?
Ответ: Изобретение есть первая часть риторики, поучающая изобретати доводы или изветы слова предложеннаго.
(2) Вопрос: Что есть довод?
Ответ: Есть укрепление, достоверну повесть творящее.
(3) Вопрос: Суть ли разныя виды изветов?
Ответ: Суть.
(4) Вопрос: Многократныя ли?
Ответ: Сугубыя. Но суть виды изветов сугубы: уверяющия и понуждающия. Уверяющия нарицаются просто доводы или изветы. Понуждающия же именуются страсти.
(5) Вопрос: Чесо ради тако?
Ответ: Яко страсти во человеце, возбуждающе разумей любовь, милосердие, гнев, ненависть, омерзение, боязнь, скорбь и прочая, не просто уверяют, но аки нуждею влекут ко соизволению на тое, о чем глаголет проповедник.
(6) Вопрос: Требуют ли некогда доводы ко подкреплению самых себе доводов или должны суть сами собою тверди и уверителни быти?
Ответ: Суть многие иже требуют, но доводы доводов паки сугубы суть: инныя нарицаются основание, инных же умножение.
(7) Вопрос: Что основание и что умножение?
Ответ: Основание есть простое подкрепление. Умножение же есть не токмо крепку, но и зело крепку и велику вещь творящее и сим от основания разнствует, яко оное подкрепляет токмо, аще что нетвердо быти мнится. Сие же и подкрепляет нетвердое и великим творит еже мнится быти невелико, например, святый
