сон
И даждь нам, Владыко Господи, на сон грядущим, покой тела и души и сохрани нас от мрачного сна греховнаго и от всякаго темнаго и нощнаго сладострастия. Укроти стремления страстей, угаси разжженыя стрелы лукаваго, яже на ны льстивно движимыя. Плоти нашея восстания утоли и всякое земное и вещественное наше мудрование успи. И даруй нам, Боже, бодр ум, целомудр помысел, сердце трезвящееся, сон легок и всякаго сатанинина мечтания изменен. Восстави же нас во время молитвы, утверждены в заповедех Твоих, и память судеб Твоих в себе твердо имуща. Всенощное славословие нам даруй, во еже пети и благословити и славити пречестное и великолепое имя Твое, Отца, и Сына, и Святаго Духа, ныне и присно, и во веки веков. Аминь.
Молитва на устроение лодки
Господи Боже отец наших, заповедавый Ною рабу Твоему устроити кивот ко спасению мира, от многих древес благоволивый ему едино древо быти и сочинитися: Сам убо, Владыко всех, благоволивый бездушными древесы правити, и крепкою Твоею рукою род человеческий спасаяй. Сам и ныне Владыко, и сей корабль соблюди, и даждь ему Ангела блага, мирна: хотящыя плыти в нем сохрани, и даждь им во своя отыти здравым, молитвами Пресвятыя Владычицы нашея Богородицы и Приснодевы Марии, силою честнаго и животворящаго креста, честных, небесных, умных сил бесплотных, святаго славнаго пророка, Предтечи и Крестителя Иоанна: святых славных и всехвальных апостолов и святаго (имя) и всех святых Твоих. Яко Ты еси окормляяй и освещаяй всяческая, Боже наш, и Тебе славу, и благодарение, и поклонение возсылаем, Отцу, и Сыну, и Святому Духу, ныне и присно, и во веки веков. Аминь.
Молитва над гумном
Господи Боже наш, источниче благих, повелевый земли извести плод, благоутробия ради Твоего и благости; благослови и умножи и гумно сие, и плодоношение рабов Твоих: исполни сокровища их всякаго благаго плода, пшеницы, вина и елеа, и сохрани их от всякаго искушения, со всеми сущими у них, и просвети их в познании Твоем, да благоугодни Тебе бывше, сподобятся вечных Твоих благ. Яко благословися Твое имя, Отца, и Сына, и Святаго Духа, ныне и присно, и во веки веков. Аминь.
Молитва над семенами
Господи Боже наш, от пречистыя и пребогатыя длани Твоея, предлежащее пред очима Твоима семен подаяние принесохом Владыко, и сему Тебе вручитися молимся: не бо сеяхом в бездушных земли недрех заключити сия, аще не воззрим на повеление Твоего Величества, повелевающее родити, и прозябати земли, и дати семена сеющему, и хлеб в снедь. И ныне молимся Тебе Боже наш, услыши ны молящыяся Тебе, и отверзи нам сокровище Твое великое, и благое, и небесное, и излей благословение Твое, донележе удовлимся по неложным Твоим обещанием: и отжени от нас вся снедающая плод наш земный и всякое наказание праведно наводимое на ны, грех ради наших: и богатыя Твоя щедроты низпосли на вся люди Твоя, благодатию и человеколюбием единородного Твоего Сына, с нимже благословен еси, и с пресвятым и благим, и животворящим Твоим Духом, ныне и присно, и во веки веков. Аминь.
Молитва человека, страдающего рассеянием, невниманием, нерадением на молитве
Рассеянный ум мой собери, Господи, и оледеневшее сердце очисти, яко Петру дая мне покаяние, яко мытарю воздыхание, и яко блуднице слезы, да велием гласом зову Ти, Боже, спаси мя, яко един благоутробен и Человеколюбец.
Молитвы о благополучии живых близких
(читает священник на молебне)
Помяни, Господи Иисусе Христе, Боже наш, милости и щедроты Твоя от века сущия, ихже ради и вочеловечился еси, и распятие и смерть, спасения ради право в Тя верующих, претерпети изволил еси: и воскрес из мертвых, вознесся еси на небеса и седиши одесную Бога Отца, и призираеши на смиренныя мольбы всем сердцем призывающих Тя; приклони ухо Твое, и услыши смиренное моление мое, непотребнаго раба Твоего, в воню благоухания духовнаго, Тебе за вся люди Твоя приносящаго. И в первых помяни Церковь Твою святую, Соборную и Апостольскую, юже снабдел еси честною Твоею Кровию, и утверди, и укрепи и разшири, умножи, умири, и непреобориму адовыми враты во веки сохрани: раздирание Церквей утиши, шатания языческая угаси, и ересей востания скоро разори и искорени, и в ничтоже силою Святаго Твоего Духа обрати. (Поклон). Спаси, Господи, и помилуй богохранимую страну нашу, власти и воинство ея, да тихое и безмолвное житие поживем во всяком благочестии и чистоте. (Поклон). Спаси, Господи, и помилуй Великаго Господина и Отца нашего Святейшаго патриарха Алексия, преосвященные митрополиты, архиепископы и епископы православныя, иереи же и диаконы, и весь причет церковный, яже поставил еси пасти словесное Твое стадо, и молитвами их помилуй и спаси мя грешнаго. (Поклон). Спаси, Господи, и помилуй отца моего духовного (имярек), братию и сестры, и сродники моя плоти, и вся ближняя рода моего, и други, и даруй им мирная Твоя и премирная благая. (Поклон). Спаси, Господи, и помилуй старцы и юныя, нищия и сироты и вдовицы, и сущия в болезни и в печалях, бедах и скорбех, обстояниих и пленениих, темницах же затачениих, изряднее же в гонениих, Тебе ради и веры Православныя, от язык безбожных, от отступников и от еретиков, сущия рабы Твоя, и помяни я, посети, укрепи, и вскоре силою Твоею ослабу, свободу и избаву им подаждь. (Поклон). Спаси, Господи, и помилуй посланные в службу путешествующия, отцы и братию нашу, и вся православныя христианы. (Поклон). Спаси, Господи, и помилуй ихже аз безумием моим соблазних, и от пути спасительного отвратих, к делом злым и неподобным приведох; Божественным Твоим промыслом к пути спасения паки возврати. (Поклон). Спаси, Господи, и помилуй ненави-дищия и обидищия мя, и творящих ми напасти, и не остави их погибнути мене ради грешнаго. (Поклон). Отступившыя от православныя веры и погибельными ересьми ослепленныя светом Твоего познания просвяти и Святей Твоей Апостольстей Соборней Церкви причти. (Поклон).
Молитвы о ближних святого Иоанна Кронштадтского
О гордом и строптивом
Господи, научи раба Твоего, в диавольскую гордость впавшаго, кротости и смирению, и отжени от сердца его мрак и бремя сатанинской гордыни!
О злобном
Господи, блага сотвори раба Твоего сего благодатию Твоей.
О сребролюбивом и жадном
Сокровище наше нетленное и богатство неистощимое: даруй рабу Твоему сему, сотворенному по образу и подобию Твоему, познать лесть богатства, и яко вся земная — суета, сень и соние. Яко трава дни всякаго человека, или яко паучина, и яко Ты еси един богатство, покой и радость наша.
О завистливом
Господи, просвети ум и сердце раба Твоего сего к познанию великих, безчисленных неизследимых даров Твоих, ихже прият от неисчетных щедрот Твоих, в ослеплении бо страсти своея забы Тебя и дары Твои богатые, и нища себя быти вмени, богат сый благами Твоими, и сего ради зрит прелестне на благая рабов Твоих, имиже, о, пренеизглаголанная Благостыня, ущедряеши всех, коегождо противу силы его и по намерению воли Твоея. Отыми, всеблагий Владыко, покрывало диавола от очию сердца раба Твоего и даруй ему сердечное сокрушение и слезы покаяния и благодарения, да не возрадуется враг о нем, заживо уловленном от него в свою волю, и да не отторгнет его от руки Твоея.
О пьянице
Господи, призри милостивно на раба Твоего, прельщеннаго лестию чрева и плотскаго веселия, даруй ему познать сладость воздержания и поста и проистекающих от него плодов Духа.
О чревоугоднике
Господи, сладчайшее Брашно наше, никогдаже гиблющее, но пребывающее в живот вечный: очисти раба Твоего от скверны чревообъядения, всего плоть сотворившегося и чуждаго Духу Твоему, и даруй ему познать сладость Твоего животворящаго духовнаго брашна, еже есть плоть и кровь Твоя и святое, живое и действенное слово Твое.
Молитва о возвращении Церкви отторгшихся от нее по навету диавола
Преподобному Симеону Столпнику
Терпния столп был еси, ревновавый праотцем. преподобне, Иову во страстях, Иосифу во искушениях и бесплотных жительству, сын в теле си...
Молитва всем святым и бесплотным небесным силам
Боже святый и во святых почиваяй, трисвятым гласом на небеси от Ангел воспеваемый, на земли от человек во святых Своих хвалимый: давый Святым Твоим Духом комуждо благодать по мере дарования Христова, и тою поставивый Церкви Твоей святей овы Апостолы, овы пророки, овы же благовестники, овы пастыри и учители, их же словом проповеди. Тебе Самому действующему вся во всех, мнози совершишася святии в коемждо роде и роде, различными добродетель-ми благоугодившии Тебе, и к Тебе нам образ добрых подвигов своих оставивше, в радости прешедшии, готови, в нем же сами искушени быша, и нам напаствуемым помогати. Сих святых всех воспоминая и их богоугодное похваляя житие, Тебе Самаго, в них действовавшаго, восхваляю, и онех благотворения Твоя дарования быти веруя, прилежно молю Тя, Святе святых, даждь ми грешному последовати их учению, паче те Твоею вседействующею благодатию, небесныя с ними сподобитися славы, хваляще пресвятое имя Твое, Отца и Сына и Святаго духа во веки.
