святых книг, по ним же детей своих духовных исправляли бы? И глаголеши: На криве бы креста не целовали, на лжи не послушествовали [3391] и именем Божиим во лжу не ротилися и не клялися, занеже православным христианом крестное целование ротою и на криве вконец отречено бысть священными правилы. И аще вконец отречено есть крестное целование ротою и на криве, почто законополагаешь? (л. 832 об.) [3392] И которыми правилами отречено есть ротитися? Покажи нам не на криве ротою крест целовати которые правила в себе имут се, еже есть крест целовати с ротою в правде. Да видевше, и мы противна таковым правилом и тебе возглаголем, и не от себе, но от Божественых писаний, якоже ты, беснуяся, везде ложь глаголешь и от своих глаголешь.
Господу глаголющу [3393]: Паки слышасте, яко речено бысть древним, не во лжу кленешися, воздаси же Господеви клятвы твоя. Аз же глаголю вам не клятися всяко, ни небом, яко престол есть Божий, ни землею, яко (л. 833) [3394] подножие есть ногама Его, ни Иерусалимом, яко град есть Великаго Царя.
Толкование.
В древнем убо речено есть законе, не приемли имени Господа Бога твоего всуе, не очистит бо Господь прилагающих имя Его туне. Аз [3395] Господь Бог ваш, да не украдите, ни солжите и не оболжете койждо подруга, и не кленитеся именем Моим на неправду, и да не оскверните имени святаго Бога вашего. Егда же аще кто кленшеся по древнему закону и исполньше клятву, о ней же клятся, той Бог воль дал есть, яко не солга. Егда же аще кто не исполнит клятвы, той прият имя Божие всуе и на неправду (л. 833 об.) [3396] и осквернил есть таковый имя Господне. И есть таковый нечист, якоже и Великий Василий пишет во своих правилех в 60 и 82 о кленущихся во лжю.
Евангелие: И [3397] иже главою своею кленыйся, яко не можеши власа единаго бела или черна сотворити.
Толкование.
Бог един токмо кленется Собою, яко ни под ким сущ. И [3398] клятся Господь Аврааму, понеже ни единем имяше болшим клятся, клялся Собою, глаголя: Аз Господь Бог твой и положу завет Мой между Мною и между тобою, истиною благословствуя, благословлю, и множа, умножу тя зело. Семени твоему дам землю сию (л. 834) [3399] и по тебе в род и род до века. Верова же Авраам Богу и вменися ему в правду. И паки инде речено есть: Клятся [3400] Господь Давиду истиною и не отвержется ея. И паки инде: Клятся Господь и не раскается. Мы же, собою не владуще, како можем во главу свою клятися, инаго стяжания сущу? Аще ли твоя есть глава, и не лепа есть, премени ю в лепую. Аще ли не можеши ю пременити, ини же власа черна на дело, почто кленешися главою своею, не суще своею, но создавшаго ю?
Евангелие: Горе [3401] вам, вожди слепии, глаголюще: Иже аще кленется церковия, ничесо же есть, а иже (л. 834 об.) [3402] кленется златом церковным, должен есть. Буии слепии, кое бо боле есть, злато ли или церкви, святящиа злато, ничесо же есть, а иже кленется даром, иже верху его, должен есть. Буи слепии, что бо боле, дар ли или олтарь, святяй дар, иже убо кленется олтарем, кленется им и Сущим верху его. И иже кленется Церковию, кленется Ею и Живущим в ней. И кленыйся небесем, кленется престолом Божиим и Седящим, и кленыйся Крестом, кленется и Распятым на нем.
Како же ты, Евангелский ругателю, смел в клятву живоносное (л. 835) [3403] и спасеное древо Креста употребити, им же вечная клятва разрушися, по писаному: Христос [3404] ны искупил есть от клятвы законныя, быв по нас клятва. Писано бо есть [3405]: Проклят всяк висяй на древе, да во языцех благословение Авраамле будет о Христе Иисусе, да обетование Духа приимем верою.
Братие, по человеку глаголю, обаче человеку утвержена завета, никто же отметает. Аврааму же речени быша обеты и семени его, не глаголет же семенем, яко о мнозе, но яко о едином «и семени твоему, яко есть Христос».
Толкование.
Смотри, богоборче и Христоборче, (л. 835 об.) [3406] чево ради крест бысть и что ради креста бысть. Крест клятва бысть, но Христос нас ради клятва бысть и своим Божеством преложи во благословение. Да благословятся о Нем, рече, вси языцы. И никто же смеет, якоже рече апостол, отметает или приповелевает. Единаго тебя не искупи Христос, понеже обетования Духа не приемлеши, ово отметаешь, ово приповелеваешь. А не погрешит слово истины, аще кто речет, яко безпосредственне все доброе Божие отринул еси от себя и все лихое и злое приповелел еси. Крест дан во благословение, а ты то преложил (л. 836) [3407] в клятву. И збысться реченое [3408]: Слово бо крестное погибающим убо юродство есть. И другое писание: Аще кто не возмет креста своего и вслед Мене не грядет, несть Мене достоин. Ты же не точию прият крест на рамо свое, но и обруга того и вместо благословения клятву сотвори.
И збысться писаное: Ров изры, ископа и, впадется в него. И другое писание: Обратится болезнь его на главу его. И паки третие: Оружие извлекоша грешницы и напрягоша луки [3409] своя [3410], состреляти нища и убога, заклати правыя сердцем. Оружие внидет в сердца их и луцы их (л. 836 об.) [3411] сокрушатся. И паки: Ею же мерою мерите, возмерится вам, и им же судом судите, осудитеся.
В твоем Уложении написано: глава 1 статья 1.
Будет кто иноверцы какия веры ни буди, или руской человек возложит хулу на Господа Бога и Спаса нашего Иисуса Христа и на Честный Крест, и про то сыскивати всякими сыски накрепко. Да будет сыщется допряма, и того богохулника казнити, зжечь. И про твое беззаконие и хулу на Господа Бога и Спаса нашего Иисуса Христа и на святый Божественый Крест Господень уста твоя и руки твоя свидетельствуют глаголаное и писаное (л. 837) [3412] Уложение, по писаному: Рабе лукавый, от уст твоих сужду тя.
Ныне же паки обретохомся на широту слова к тебе. Пишешь: На криве креста не целовали и именем Божиим во лжю не ротились.
Покажи трегубому твоему беззаконию, еже предпочел еси оружие паче воина, и оружие не яко оружие Божие употребил еси, даное на сопостата нашего диавола, но оружие беззаконию и еже не клятися именем Божиим во лжю. Богу заповедающу и глаголющу: Аз же глаголю вам, не кленитеся ни небом, ни землею, ни иною коею клятвою, даже до главы своея. А ты, окаянне, преминув вся сия, (л. 837 об.) [3413] на пресовершеннейшую Главу и не на главу точию, но на всего Бога. И глаголеши: Занеже православным христианом крестное целование ротою и на криве вконец отречено бысть священными правилы. Рцы нам, которыми правилы? И паки глаголеши: Но вдан от Христа христином крест на освящение и просвещение и на отгнание врагов видимых и невидимых. И того ради православным христианом достоит святому Кресту верою покланятися и истиною и чистотою и того честнаго Креста целовати со страхом и с трепетом и чистою совестию. Сия вся предпочел еси яко лествицу святу. (л. 838) [3414] Почто ты законом своим осквернил еси Того честь и святыню? Бога заповедающу: Не кленитеся ни небом, ни землею, ниже главою своею и иною клятвою коею. А ты от пречестнейших вещей Божиих оружием Божиим Всечестным и Животворящим Крестом Господним клятися уставил. Буе ослепленне, не слышали выше писанаго, како Христос к жидом отвеща: Горе вам, вожди слепии, глаголющии, иже аще кто кленется Церковию, ничесо же есть, а иже кленется златом церковным, должен есть.
Толкование.
Сего ради слепых и буих именует Христос, яко научающих (л. 838 об.) [3415] подобная и худейшая предпочитающих. Достойна же почитанию долейшая имуще, злато, иже на храме, и херувими и стамну златую, сих почитах паче самаго храма того. Тем же и многия учаху, яко несть ничто же, еже в храм клятися, но в злато [3416], слежащее в храме. Злато бо сего ради веде честно бяше, понеже в храме слежаше, таже глаголется даром, иже верху его должен есть, и дарове, убо иже на жертвеник возлагахуся честнейшая, паче жертвеника самаго глаголаху быти. И тако предаяху фарисее, глаголюще: Яко аще кто клялся есть в злат сосуд или (л. 839)
