Феогноста,/ Казахстану заступников/ и граду Алма-Ате хранителей,/ иже припадают ко престолу Вседержителя/ и к стопам Пречистыя Девы Богородицы,/ усердно молящеся о нас.
Евангелие от Матфея, зачало 36:
Славу преподобных и мучеников украшение,/ вышняго Сиона жителей,/ земных ангелов и небесных человеков,/ постников споспешников и девственников похвалу,/ иноков путевождей и удобрение,/ приидите праздно любных собори,/ ныне псаломски воспоим,/ похвальные венцы любовию сплетше,/ и духовный лик у честнаго гроба преподобномученик Серафима и Феогноста составим,/ и принесем духовную песнь:/ честна смерть ваша пред Господем, преблаженнии,/ и покой со святыми/ но, аще духом вашим на Небеси пребываете,/ телесами выну с нами есте/ и покланяющихся Святым мощем вашим/ даров духовных исполняете/ и молитеся со дерзновением прилежно/ даровати нам единомыслие/ и всему миру утверждение.
Канон преподобномучеником
Глас 4-й
Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама/ Амаликову силу в пустыни победил есть.
Агнче Непорочне, Слове Божий,/ отверзи ми устне недостойнии,/ да возмогу воспети новыя преподобномученики Твоя,/ Серафима и Феогноста всехвальныя.
Были есте пустыннаго Кызылжарского урочища/ на горах Тяньшанских жителие/ и Небеснаго Царствия наследницы страданием вашим явилися есте./ Темже Христу Богу представ, радуяся, воспели есте:/ славно бо прославися.
Делателие блаженнии бывше заповедей Господних,/ Пресвятому Духу селения достославная себе устроиша/ и Ангелов явилися есте собеседницы/ и человеков наставницы,/ поюще Богови: славно бо прославися.
Всечистая Богородительнице, Дево Владычице Всепетая,/ моли Егоже родила еси, Бога и Царя нашего,/ да милостив будет нам в день Судный.
Песнь 3-я
Не мудростию, и силою, и богатством хвалимся,/ но Тобою Отчею Ипостасною Мудростию Христе;/ несть бо Свят, паче Тебе, Человеколюбче.
Сокрушенною совестию Богу угодивше,/ сокрушисте вражия величания, блаженнии,/ в Небесная селения мучением вашим внидосте,/ радуяся вопиюще:/ несть Свят и несть праведен, паче Тебе Господи, Человеколюбче.
Отец лжи и человекоубийца искони диавол/ наведе на вы лукавых человек разбойническим нашествием,/ вы же преподобнии,/ первее слез ваших теченми фараона мысленнаго победивше,/ последи же и в кровных потоцех ваших того сокрушили есте,/ Избавителю и Богу нашему вопия:/ несть Свят и несть праведен, паче Тебе Господи, Человеколюбче.
Иногда преподобнии отцы в Синаи и Раифе/ избиени быша от неверных,/ выже прехвальнии, в последняя сия времена/ от безбожных разбойнически умерщвлены за Христа./ Тем радуетеся с постники Христовыми и мученики, поюще:/ несть Свят и несть праведен, паче Тебе Господи, Человеколюбче.
Милосердия сущи источниче,/ не лиши и нас милости Твоея, Богородительнице,/ но присно о нас Владыку всех и Господа моли:/ свободити нас от врагов, борющих ны,/ в православнем благочестии утвердити/ и пристанища небурного спасения достигнути.
Песнь 4-я
Вознесена Тя видевши Церковь на Кресте,/ Солнце праведное,/ ста в чине своем/ достойно взывающи:/ слава силе Твоей, Господи.
От юности утреневав Христу, Солнцу правды,/ тьмы избегли есте телесных страстей воздержанием,/ и умную чистоту безстрастием стяжав,/ Духа Святаго вместилища благоуханные явилися есте,/ Имже в сердцах ваших пели есте:/ слава силе Твоей, Господи.
Воздержания в житии вашем восприяв правило,/ яко безплотныя во плоти явилися есте,/ смирение и кротость, и молитву неоскудную/ и стояние всенощное, и веру истинную,/ и любовь нелицемерную испрЕ вили есте, блаженнии./ Темже мученически от земли к небеси прешедше,/ со Ангелы водворяетеся, воспевая:/ слава силе Твоей, Господи.
Божественныя Святаго Духа зари разумно приемля,/ Трисиянного и Трисолнечнаго Божества обители были есте чистии,/ всеблаженнии Серафиме и Феогносте, преподобнии./ Ангелы споспешники имея,/ и путь мученический, вводящий к Божественному покою, прошедше,/ радостно воспевали есте:/ слава силе Твоей, Господи.
Обновляет человеческий род Превечнаго Света Ангел,/ явлься от Девы, и человек быв./ Тому вернии возопиим:/ слава силе Твоей, Господи.
Песнь 5-я
Ты Господи мой, Свет/ в мир пришел еси,/ Свет святый, обращаяй из мрачна неведения/ верою воспевающия Тя.
Христову Престолу во славе ныне предстояще,/ венценоснии страстотерпцы,/ светоносную нам зарю/ и духовную благодать с Небесе низпошлите/ благоприятными вашими, преподобномученицы, молитвами. Идеже мучеников собори,/ идеже всех святых святое упокоися множество,/ идеже праведных дуси и Церковь перворожденных,/ ныне на Небесех веселитеся воистинну, яко новомученицы/ преподобнии Серафиме и Феогносте./ Темже вси вас верою и любовию ублажаем.
Добрый жития подвиг ваш скончавше,/ и веру непорочну соблюдше,/ венцы нетленныя от Бога прияли есте, блаженнии./ И зерцалам разрешенным лицем к лицу Святую Троицу зрите/ Ейже со всеми святыми молитеся о чтущих память вашу, преподобномученицы.
Страстей моих утиши бурю,/ неусыпною твоею молитвою/ Дево Пречистая, молю Тя:/ и не даждь ми сном тяжким и греховным уснути.
