изведи из темницы, да прииду к Тебе. Аминь.
Господи Иисусе Христе, Боже наш! Приими от нас недостойных рабов Твоих усердное моление сие и, простив нам вся согрешения наша, помяни всех врагов наших, ненавидящих и обидящих нас, и не воздаждь им по делом их, но повелицей милости Твоей обрати их: неверных ко правоверию и благочестию, верных же во еже уклонитися от зла и творити благое. Нас же всех и Церковь Твою Святую всесильною Твоею крепостию от всякаго злаго обстояния милостивно избави. Отечество наше от лютых безбожников и власти их свободи, верных же рабов Твоих, в скорби и печали день и ночь вопиющих к Тебе, многоболезненный вопль услыши, многомилостиво Боже наш, и изведи из истления живот их. Подаждь же мир и тишину, любовь и утверждение и скорое примирение людем Твоим, ихже честною Твоею Кровию искупил еси. Но и отступившим от Тебе и Тебе не ищущим явлен буди, во еже ни единому от них погибнути, но всем им спастися и в разум истины прийти, да вси в согласном единомыслии и в непрестанной любви прославят пречестное имя Твое, терпеливодушне, незлобиве Господи, во веки веков. Аминь.
Отец небесный, во имя Сына Твоего Единороднаго услыши нашу молитву; прости наша прегрешения, спаси Россию, Русскую Православную Церковь умножи, расшири, укрепи и непреобориму адовы враты во веки сохрани, всех заблудших чад ея в лоно ея возврати, раскол предотврати и воздвигни род христиан православных, мерзкое богохульное агарянское безбожное царство скоро испровержи и правоверным царем паки предаждь, предотврати все аварии и убийства, яже замышляют враги наша, предотврати самоубийства и запрети врагом нашим творити нам злая и имиже веси судьбами спаси нас, молитвами Богородицы и всех святых Твоих. Аминь.
Господи Боже наш, Великий и Многомилостивый! Во умилении сердец наших смиренно молимся Тебе: сохрани под кровом Твоея благости от всякаго злаго обстояния Святую Церковь Твою и нас, в скорби сущих верных чад ея. Огради нас на всех путех наших святыми Твоими ангелы, да ничтоже успеют обидящия нас. Исполни нас долготою дний и крепостию сил, да совершим вся во славу Твою и во благо Святыя Церкве Твоея. Мы же, всеблагому Твоему промышлению о нас радующеся, на всяк день и час благословим и прославим всесвятое имя Твое, Отца и Сына и Святаго Духа. Аминь.
Господи Иисусе Христе, Боже мой, посещаяй тварь Свою, Тебе же явлены страсти моя и немощь естества моего человеческаго и крепость супостата моего! Ты Сам покрый мя от злобы его, зане сила его крепка, естество же мое страстно и сила моя немощна. Ты убо, о Благий, ведый немощь мою и носяй неудобство безсилия моего, сохрани мя от смущения помыслов и потопа страстей, и достойна сотвори мя службы Твоея святыя, да не како в страстех моих растлю сладость ея, и обрящуся безстуден пред Тобою и дерзостив. Господи, Пресладкий мой Иисусе, помилуй и спаси мя, яко Твоя держава, и Твое есть Царство, и сила, и слава, со Безначальным Твоим Отцем, и с Пресвятым и Благим и Животворящим Его Духом, ныне и присно и во веки веков. Аминь.
Скоро предвари, прежде даже не поработимся врагом хулящим Тя и претящим нам, Христе Боже наш: _погуби крестом Твоим борющия нас_,[568] да уразумеют, како может православных вера, молитвами Богородицы, едине Человеколюбче.
Возбранный Воеводо и Господи, ада победителю, яко избавлься от вечныя смерти, похвальная восписую Ти, создание и раб Твой; но яко имеяй милосердие неизреченное, от всяких мя бед свободи, зовуща: Иисусе, Сыне Божий, помилуй мя.
Живый в помощи Вышняго, в крове Бога Небеснаго водворится. Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи, и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тьме преходящия, от сряща, и беса полуденнаго. Падет от страны твоея тысяща, и тма одесную тебе, к тебе же не приближится, обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему, яко ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою, на аспида и василиска наступиши, и попереши льва и змия. Яко на Мя улова, и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его, долготою дней исполню его, и явлю ему спасение Мое.
Да воскреснет Бог, и расточатся врази Его, и да бежат от лица Его ненавидящий Его; яко исчезает дым, да исчезнут; яко тает воск от лица огня, тако да погибнут беси от лица любящих Бога, и знаменующихся крестным знамением, и в веселии глаголющих: радуйся, Пречестный и Животворящий Кресте Господень, прогоняяй бесы силою на тебе пропятаго Господа нашего Иисуса Христа, во ад сшедшаго и поправшаго силу диаволю, и даровавшаго нам тебе, Крест Свой Честный, на прогнание всякаго супостата. О, Пречестный и Животворящий Кресте Господень, помогай ми со Святою Госпожею Девою Богородицею и со всеми святыми во веки. Аминь.
О, Всечестный и Животворящий Кресте Господень, Кровию Христа Бога нашего освященный, и смертию Его нас от смерти вечныя свободивый, на тебе изволившему пострадати, весь народ искаше прикасатися, яко сила от него исхождаше, и исцеляше вся. Ты еси знамение победы на врагов наших видимых и невидимых; ты имаши явитися в час Страшнаго Суда Христова; тебе смиренно покланяюся, честно прикасаюся и любезно тя лобызаю, нынешнее моление к Распятому на тебе принося, да исцелит мя силою в тебе Своею от всех недугов душевных и телесных, и сохранит от врагов видимых и невидимых, и неосужденна на Суде Своем одесную поставит. Ей, Животворящий Кресте святый, на тебе Спас умирая за умерших грехами человеков, Дух Свой яко человек испусти, Кровь же и воду источи, и сими треми едино, еже паче всех есть на потребу, спасение нам содела: во славу источника вод живых Бога Отца, Себе же от кровей Девических воплощенна Бога Сына, и Бога Духа Святаго, оживляющаго дух человечь; Ихже Триех во Едином Божестве пособи и мне славити благодарственно, от воды крещения восприятою верою непорочною, в причастии же Плоти и Крове Господня надеждою несумненною, и в покаянии от духа сокрушенна, любовию нелицемерною; ниже токмо в жизни сей плачевной, яко вода мимотекущей, бранен и кровей исполненной и яко пара исчезающей с воздыханием, но и в будущей блаженной, пособием силы твоея, Кресте треблаженне, да прославлю самым лица зрением верованнаго, одержанием чаяннаго и наслаждением любимаго, Единаго в Троице Бога, славимаго в безконечныя веки. Аминь.
Господи, обрати к Тебе и сердца врагов (воров[569]) наших, и если не возможно уже ожесточенным обратиться, то положи преграду зла их и защити от них избранных Твоих, молитвами Богородицы и всех святых Твоих. Аминь.
Все тщание гордого диавола состоит в том, – говорил преподобный отец наш Серафим, Саровский чудотворец, – чтобы возмутить дух. человека и в возмущении посеять свои плевелы. Когда же человек старается иметь сердце смиренное и мысль сохранить в мире, тогда все козни вражий бывают бездейственны; ибо где мир помыслов, там почивает Сам Бог: в мире, сказано, место Его.
