Древние Литургии

них, о мире и безмятежии их, Господу помолимся.

— О плодоносящих и добродеющих во святых Божиих церквах, и поминающих убогих, вдовицы и сироты, странные и в нужде сущыя и о заповедавших нам, яко да помянем их в молитвах, Господу помолимся.

— О еже в старости и в немощи сущих, болящих, труждающихся, и от духов нечистых стужаемых, еже от Бога скором исцелении и спасении их, Господу помолимся.

— О еже в девстве и чистом подвизе, и в честнем браце пребывающих, и о еже в горах, вертепах и пропастех земных подвизающихся преподобных отцех и братиях, Господу помолимся.

— О плавающих, путешествующих, странствующих христианех, и о еже в пленении и изгнании, и в темницах и в тяжких работах сущих братиях наших, мирном возвращении коегождого в дом его с радостию, Господу помолимся.

— О предстоящих и сомолящихся нам в час сей святый и во всякое время отцех же и братиях, тщании, труде и усердии их, Господу помолимся.

— И о всякой душе христианстей, скорбящей и озлобленней, милости Божия и помощи требующей, и о обращении заблудших, здравии болящих, о свобождении плененных, упокоении преждепочивших отец и братий, Господу помолимся.

— О оставлении грехов и прощении согрешений наших, и о еже избавитися нам от всякия скорби, гнева, беды и нужды, и возстания язык, Господу помолимся.

— Пространнее о благорастворении воздухов о дождех мирных, росах благих, плодов изобилии, совершенном плодородии и о венце лета, Господу помолимся.

— О еже услышану быти молению нашему пред Богом и ниспослатися нам богатым милостем и щедротам Его, Господу помолимся.

— Пресвятую, пречистую, преславную, благословенную Владычицу нашу Богородицу и Приснодеву Марию, святых и блаженных Иоанна, славнаго пророка, Предтечу и Крестителя, Стефана перводиакона и первомученика, Моисеа, Аарона, Илию, Елисея, Самуила, Даниила, Давида пророки, и вся святыя и праведныя помянем, яко да молитвами и молениями их и предстательствами вси помилованы будем.

— О Предлежащих честных и пренебесных, неизреченных, пречистых, славных страшных, ужасных божественных Дарех и о спасении предстоящего и приносящего сия: честнаго (имя рек предстоящего), Господа Бога молим.

Народ: Господи, помилуй. (трижды)

Предстоятель: Слава в вышних Богу, и на земли мир, в человецех благоволение (трижды).

Господи, устне мои отверзеши, и уста моя возвестят хвалу Твою (трижды) .

Да исполнятся уста моя хваления Твоего, Господи, яко да воспою славу Твою, весь день великолепие Твое (трижды).

Слава Отцу, и Сыну, и Святому Духу ныне и присно, и во веки веков.

Народ: Аминь.

Предстоятель с Диаконом, выходит через святые двери на солею и лицом к народу поёт это вместе с Диаконом, а после того, как народ ответил, он кланяется и возвращается к святому престолу. Сотворив поклон сослужащим, поет вместе с ними во глас 5–й, со сладкопением:

Предстоятель: Возвеличите Господа со мною, и вознесем имя его вкупe.

Народ (глас тот же): Дух Святый найдет на тя, и сила Вышнего осенит тя.

Молитва св. Иакова Иерусалимскаго

Предстоятель (негромко): Призревый на ны милостию и щедротами, Владыко Господи, и даровавый дерзновение нам смиренным и грешным и недостойным рабом Твоим предстояти святому Твоему жертвеннику и приносити Тебе страшную сию и безкровную жертву о наших гресех и людских неведениих, призри на мя, непотребного раба Твоего, и изглади моя прегрешения благоутробия ради Твоего, и очисти моя уста и сердце от всякия скверны плоти и духа, и остави от мене всякий промысел срамный же и неразумный, и удовли мя силою всесвятаго Твоего Духа, в службу сию, и приими мя ради Твоея благости, приближающагося святому жертвеннику, и благоволи, Господи, приятным быти приносимым Тебе даром сим руками нашими, снисходяще моим немощем, и не отвержи мене от лица Твоего, ниже возгнушайся моего недостоинства, но помилуй мя, Боже, и по множеству щедрот Твоих презри беззакония моя, яко да неосужденно пришед пред славу Твою, сподоблюся покрова единородного Твоего Сына и озарения Всесвятаго Твоего Духа, и не яко раб греха отвержен буду, но яко раб Твой обрету благодать и милость и оставление грехов, в сем и будущем веце.

Возгласно: Ей, Владыко Вседержителю, всесильный Господи, услыши моление мое: ты бо еси вся действуяй во всех, и от Тебе вси чаем во всех помощи же и заступления, и от Единородного Твоего Сына, и животворящего Духа, ныне и присно и во веки веков.

Народ: Аминь.

Предстоятель: Боже, иже ради многаго Твоего ради и неизреченного человеколюбия ниспославый Единородного Сына Твоего в мир, да заблудшее возвратит овча, не отвратися нас грешных, вручающим Ти страшную сию и бескровную жертву: не бо на правды наша уповаемы есмы, но на милость Твою благую, (лицем к народу): еюже наш род соблюдаеши. И ныне молимся и просим Твою благостыню: да не будет во осуждение людем Твоим устроенное нам сие ко спасению таинство, но во оставление грехов, во обновление душ и телес, во благоугождение Тебе, Богу и Отцу милостию и человеколюбием Единароднаго Сына Твоего, с ним же благословен еси, со Пресвятым, и благим и животворящим Твоим Духом, ныне и присно, и во веки веков.

Народ: Аминь.

Молитва в алтаре («за завесой»):

Предстоятель: Благодарим Тя, Господи Боже наш, яко дал еси нам дерзновение во входе святых, егоже обновил еси нам путь новый и живый чрез завесу плоти Христа Твоего. Сподобившеся же внити на место селения славы Твоея, внутрь же быти завесы, и святая святых зрети, припадаем благостыне Твоей, Владыко, помилуй нас, понеже пристрашни и трепетни есмы хотяще предстояти святому Твоему жертвеннику, и приносити Тебе страшную сию и бескровную жертву о наших гресех и людских неведениих. Ниспосли на ны Боже, благодать Твою благую, и освяти души и телеса и дуси, и премени помышления наша ко благочестию, яко да чистой совестию принесем Тебе милость, мир, жертву хваления. Милостию и щедротами Единородного Сына Твоего, с Ним же благословен еси, со Пресвятым и Благим и Животворящим Твоим Духом, ныне и присно и во веки веков.

Народ: Аминь.

Преданафоральная часть.

Предстоятель: Мир всем!

Народ: И духови твоему.

Диакон: Станем добре. Станем благочестне. Станем со страхом Божиим и сокрушением. Вонмем: святое возношение в мире Богу приносити.