умела зделать, и слушку научить. То государыня домовная и домоводицы добрые. И то бы знала же пивной, медовой и винной и бражьной, квасной и уксусной, и кислаштяной и всякой обиход как делают, и поваренной и хлебной; и в чем что родится и колко из чево будет. Коли все знает доброго мужа наказанием и грозою, и своим добрым разумом, ино все будет споро и всево будет много.
А которая женьщина или девка рукодельница, и той дела указати: рубашка делати, или убрус брати и ткати, или золотное или шелковое пяличное дело; и которая чему учена, того всего досмотрити и дозрети и всякой мастери самой; прядено и тафта и камка и золото и серебро отвесити и отмерити, и сметити, и указати сколко чего надобно, и сколко чего даст; и прикроити и примерити; самой все рукоделие знати. А малых девок учити, которая чево пригоже; а мужним женкам, которые черное дело делают, избу топят, и хлебы пякут и платья моют: тем лен дают на себя и на мужа и на дети прясти; а одиная женочка, или девка, на государя лен прядет, а изгребии и пачеси на себя, или как пригоже. А все бы ведала сама государыня, которой дело какое даст, колко чево даст и колко чево возмет; и сколко чего сделает кто днем: много ли мало, и сколко из чево выйдет: то бы сама все знала, и в счете бы было все.
А сама бы государыня, отнюдь никакоже, никоторыми делы, опрично немощи без дела не была, ино и слушкам, на нее смотря повадно делати. Мужь ли придет, гостья ли обычная приидет, всегда бы над рукоделием сидела сама: то ей честь и слава, и мужу похвала: а николи же бы слуги государыни не будили: государыня бы слуг будила. А ложася бы спать всегда от рукоделия молебная совершив.
Стол и блюда, и ставцы и лошки, и всякие суды и ковши, и братены, воды согрев из утра, перемыти и вытерьти и высушить; а после обеда, такоже, и вечере А ведра, и ночвы, и квашни, и корыта, и сита, и решета, и горшки, и кувшины, и корчаги — та-кож всегды вымыти, и выскресть, и вытереть, и высушить, и положить в чистом месте, где будет пригоже быти; всегда бь всякие суды и всякая порядня, вымыто и чисто бы было; а по лавке и по дьору, и по хоромам, суды не волочилися бы, а ставцы, и блюда, и братены, и ковши, и лошки по лавке не валялися бы, где устроено быти, в чистом месте лежало бы опрокинуто ниц; а в каком судне што: ества или питие, — и то бы покрыто было, чистоты ради; и всякие суды, с ествою или с питием, или с водою, или квашня ростворить, — всегды бы покрыто было, а в избе и повязано, от тороканав и от всякия нечистоты.
Изба, и стены, и лавки, и скамъи, и пол, и окна, и двери, и в сенех, и на крылцы, — вымыть и вытереть и выместь и выскресть, — всегда бы было чисто; и лестницы и нижнее крылце, — все бы то было измыто, и выскребно, и вытерто и сметено; да перед нижним крыльцом сена положить: грязные ноги отирать; ино лесница не угрязнится и у сеней перед дверьми рогошка или войлок ветшаной положить, или потирало: ноги грязные отирать, чтобы мосту не грязнить. В грязное погодье у нижнего крылца, сено или солома перемениги, а у дверей рогозинка или войлок перемени, или потирало чистое положить, а грязное прополоскать и высушить; и опять тут же, под ноги пригодится. Ино то, у добрых людей, у порядливой жены, всегды дом чист и устроен; все по чину: и упрятано, где что пригоже, и причищено и приметено; всегды в устрой как в рай войти!
Всего того, и всякой порядни жена смотрила, — и учила слуг и детей добром и лихом; не имет слово, — ино ударить. И увидит муж, что не порядливо у жены и у слуг, или не по тому, о всем, что в сей памяти писано, — ино бы умел свою жену наказывати всяким разеуждением и учити. Аще внимает, и потому все творити, и любити и жаловати. Аще жена по тому научению и наказанию не живет, и так того всего не творит и сама того не знает, и слуг не учит — ино достоит мужу жена своя наказывати, и ползовати… на едине; и понаказав, и пожлловати, и примолвити; и любовно наказывати и разеужати; а мужу на жену не гневатися, а жене на мужа: всегды жити в любви и чисто-сердии. И слуги, и дети тако же, посмотря по вине и по делу, наказывати, и раны возлогати: да, наказав, пожаловати; а государыни за слуг печаловатися, по разсуждению: ино служкам надежно. А только жены, или сына или дщери, слово или наказание не имет, не слушает и не внимает и не боитца и не творит того, как муж или отец или мати учит, — ино плетью постегать, по вине смотря; а побить не перед людьми; наедине: поучити да примолъвити и пожаловати, а никако же не гневатися ни жене на мужа, ни мужу на жену. А про всяку вину: по уху, ни по видению, не бити, ни под сердце кулаком, ни пинком, ни посохом, не колоть; ни каким железным или деревянным не бить: хто с серца или с кручины так бьеть, — многи притчи от того бывают, слепота и глухота, и руку и ногу вывихнут, и перст; и главоболие и зубная болезнь… А плетью с наказанием бережно бити: и разумно и болно и страшно и здорова. А толко великая вина и кручиновата дело и за великое и за страшное ослушание и небрежение, — ино соимя рубашку плеткою вежливенько побить, за руки держа: по вине смотря; да поучив примолвити; а гнев бы не был, а люди бы того не ведали и не слыхали; жалоба о том не была.
А по людцкой ссоре или по оговору, без обыску, без прямого, брань и побои и гнев никако же бы не было: каково было поношение или речи недобры, или своя примета, — того наедине пытати, добром: истинне покается безо всякого лукавства, — милостивно наказать, да и пожаловати по вине смотря; а толко не виновато дело, ино оговорщиком не попущати, ино бы вперед вражда не была, а только по вине и по обыску по прямому; а не каетца о грехе своем и о вине: то уже наказание жестоко надобеть, — штобы был виноватой — в вине, а правой — в правде: поклонны главы меч не сечет: а покорно слово кость ломит….
А в житницах бы у ключника был бы всякий запас и всякое жита: солод и рожь, овес, пшеница не сгноено, и не накапала бы и не навьяло; не проточено от мышей и не слеглося, и не затхло бы ся. А что в бочках или в коробах: мука и всякой запас, и горох, и конопли, и греча, и толокно, и сухари, и ржаные и пшеничные, то бы было все покрыто и судно твердо и не намокло бы, и не згнило и не затхлося. А всему бы тому была мера и счет: сколько чево из села или из торгу привезут, — и записати; а что весовое, то взъвесити; и колко коли отдаст чево на расход или взаймы и на всякой обиход, или кому государь велит что дата, то все записати же. И сколко чево сделают, то бы было ведомо ж: и хлебы и колачи, и пиво, и вино, и брага, и квас, и кислые шти, и уксус, и высевъки, и отруби, и гуща всякая, и дрожжи, и хмелины, то бы было все у ключника в мере и записано, а хмель и мед и масло и соль вешено.
122. КНЯЗЬ И. М. КАТЫРЕВ-РОСТОВСКИЙ. «НАПИСАНИЕ ВКРАТЦЕ О ЦАРЕХ МОСКОВСКИХ»
Царь Иван образом нелепым, очи имея серы, нос протягновен и покляп; возрастом[140] велик бяше, сухо тело имея, плещи имея высоки, груди широкы, мышцы толсты; муж чюднаго разсуждения, в науке книжняго почитания доволен и многоречив зело, ко ополчению дерзостен и за свое отечество стоятель. На рабы от бога данныя ему жестосерд велми, на пролитие крови и на убиение дерзостен велми и неумолим; множество народу от мало и до велика при царстве своем погуби, и многия грады своя поплени, и многия святителския чины заточи и смертию немилостивою погуби, и казни многая содеях над рабы своими, жен и дщерей блудом оскверни. Той же царь Иван многая и благая сотвори, воинство велми любляше и требующая ими от сокровищ свое неоскудно подаваше. Таков бе царь Иван. Царь же Федор возрастом мал бе, образ посничества нося, смирением обложен, о душевней вещи попечение имея, на молитве всегда предстоя и нищим, требующая подая; о мирских же ни о чем попечение имея, токмо о душевном спасении. От младенства даже и до конца своего тако пребысть, за сие же спасенное дело бог царство его миром огради, и враги его умири, и время благотишно подаде. Таков бе царь Феодор.
Царь же Борис благолепием цветуще и образом своим множество людей превзошел, возрасту посредство имея; муж зело чюден в разсуждении ума доволен и сладкоречив велми, благоверен и нищелюбив и строителен зело, о державе своей многое попечение имея и многое дивное о себе творяше. Едино же имея неисправление и от бога отлучение: ко врачей сердечное прилежание и ко властолюбию несытное желание; и на прежебывших ему царей ко убиению имея дерзновение, от сего же и возмездие восприят.
