Мечта о русском единстве. Киевский синопсис (1674)

106. О взятии Стольнаго Российскаго града Киева от Ли&товскаго Князя Гедимина, и о присоединении Княжения Киевскаго к Литовскому.

107. Откуду два Митрополиты в России, един в Москве, а другий в Киеве.

108. О сем, когда в Царствующем граде Москве Патриаршеский Престол устроися.

109. О превращении Великаго Княжения Киевскаго в Воеводство.

110. О возвращении на первое паки Царственное бытие богоспасаемаго града Киева.

111. О первом бесурманском приходе под Чигирин.

112. О втором бесурманском приходе под Чигирин.

113. О преславной победе над Турками и Татарами бывшей на горе.

114. О пришествии под Чигирин войск православных.

115. О возвращении войск Христианских от Чигирина, и о убегших Турках и Татарех от Войск православных.

116. О приходе множественных сил Царских и войск Запорожских к Киеву в лето от создания мира 7187, от рождества же Христова 1679.

1. О НАЧАЛЕ древняго Славенскаго народа.

БЕЗНАЧАЛЬНА РОДИТЕЛЯ и Творца всея твари угодник, корень же и прародитель человеческаго рода по плоти, великий в Патриарсех Ное, по потопе трием сыном своим, яко житие в мире сем на три чины раздельши, коемуждо особ назнаменована и определи: Симу сан Священства, Хаму иго работы, Афету достояние Царско, храбрость воинственну, и расширение племене по имени его (Афет бо толкуется разширение или разширителен); такожде им и землю в три части раздели, от них же первая нарицается Азия, вторая Африка, третия Европа. Симу яшася страны к востоку зрящие, в великой Азии, идеже ныне Персы и Ассирияне. Хаму паде жребий на полуднев Африце, идеже ныне Египет Муринския земли. Афету же осташася страны на запад и полунощь в Европе лежащия. А сей Афет есть прародитель и отец всех, наипаче в Европе обитающих народов. Ибо по благословении отца своего Ноя, сице от благополучнаго имени своего в велие размножение племенем своим возрасте, яко не точию по странам полунощным и западным, но и по восточным расширися. И тако оттуду ведати известно подобает, яко Славеноросский Христианский народ имат начало свойственнаго родства своего от Афета, Ноева сына, и честию благонарочитыя породы своея от негоже, яко от отца, на своя чада изшедшею, от рода и в род, аки неким венцем присноцветущия славы украшаем, величается.

2. О ИМЕНИ И О ЯЗЫЦЕ Славенском.

ТОЙЖЕ НАРОД (или племя Афетово) расширившися на странах полунощных, восточных, полуденных и западных, прочиих всех силою, мужеством и храбростию превзыде, страшен и славен всему свету бысть (яко вси ветхии и достоверныи летописцы свидетельствуют); ни в чесом бо ином, точию в деле воинственном упражняшеся, и оттуду пропитание и всякия нужды своя исполняше, и от славных делес своих, наипачеже воинских СЛАВЯНАМИ, или СЛАВНЫМИ зватися начаша. Такожде и язык Славенский един от седмидесят и двух, от столпотворения по размешении языков изшедший, им же даде Бог племени Афетову глаголати, от славы имени СЛАВЯНОВ, СЛАВЕНСК наречеся. Сего в ради в память славы народа СЛАВЕНСКА и древнии Российскии Князи сыном своим имена припрязающе к славе, даяху: якоже Святослав, сиречь святую снабдеваяй славу, или Светослав, светяйся славою; Ярослав, яряся за славу; Мстислав, мстяся о славе; Мечислав, яко славен бо от меча, и прочая сим подобная.

3. О СВОБОДЕ ИЛИ ВОЛЬНОСТИ Славенской.

СЛАВЯНЕ В ХРАБРОСТИ и мужестве своем день от дне крепко подвизающеся, воеваша еще и противу древних Греческих и Римских Кесаров, и всегда славную восприемлюще победу, во всяческой свободе живяху; пособствоваху же и великому Царю Александру Македонскому и отцу его Филиппу подбивати под власть Света сего державу. Темже, славных ради дел и трудов воинских, даде Александр Царь Славяном привилей или грамату на пергамени златом написаную в Александрии, вольности и землю им утверждающи, пред Рожеством Христовым году 310; и Август Кесарь (в егоже Царство Царь славы Христос Господь родися) не дерзаше с свободными и сильными Славянами брани свести. Неции советоваху ему воевати с ними: но он на совет их тако отвещаваше: не подобает мне златою удицею рыбы ловити, аки бы рекл: не хощу я больше изгубити, нежели обрести; и писаше Август Кесарь к единому от Гетманов своих Лентулиеви, заповедуя, да отнюд Славянов раздражати войною не дерзает. Обретаетжеся в летописех Польских, яко власть Славеноросская и Риму досязаше, и Князь некий Славеноросский Одонацер войною доставши Рима, держаше его под властию своею лет тринадесят. Славяне же разсеявшеся, и оседше различныя страны, разными имены прозвашася, о них же будет особно ниже: а зде абие предлагаются три части света, ради ведения, где кия царства обретаются и народы, наипаче где Славяне Русь и прочая обитают.

4. О ТРЕХ ЧАСТЕХ СВЕТА, именуемых АЗИЯ, АФРИКА И ЕВРОПА, вкратце извещение.

О АЗИИ.

АЗИЯ, ЧАСТЬ есть света большая и изящнейшая; большая сего ради, яко превосходит далече Африку и Европу величеством; изящнейшая того ради, яко в ней Бог рай насади, человека сотвори и закон даде; в ней Земля обетованная, Христос родися, поживе, умре, и воскресе; от нея изыдоша первыи жители всея земли и моря, Звездочетцы и прочая учения. Оттуду всякия аромата, кадила, пряннии зелия, си есть благоуханныя корения, цветы и корицы, камение дражайшее и лучшее. Она всех Царств и Государств крепких материю еще древле нарицашеся, ради величества своего, воздуха мерна, остроумия человеческаго, богатых сокровищ и изобилия всякаго добра. Тамо Царствия цветоша Ассириянов, Мидов, Персов, Парфов. Тамо Тартария, Китая, Хина, Персия, Аравия, Идумеа, Сириа, Финикиа, Ассириа, Келесириа, Каппадокиа, Пафлагониа, Вифиниа, Троада, Иониа, Кариа, Ликиа, Памфилиа, Киликиа и Татаре, от них же Храбрый Царь и Великий Князь Московский Иоанн Васильевич многое множество к православной вере обрати, и пристяжа с Царствы Астраханским и Казанским, иже и доныне с прочими многими Государствы под величайшаго государства Московскаго благополучною властию суть. Придаетже ся к сей великой Азии и вторая меньшая Азия, или Натолия; а в той заключается вся страна, яже есть между Евфратом и морем зовомым Эгеум, разделена от Турков на четыри Башовствия; ту Фригия, Лидия и Ликаония, Армения, Иверия, или Грузинское Царство и прочая.

О АФРИЦЕ.

АФРИКА ТАКОЖДЕ часть есть всея земли, назвася от Афра, единаго из племени Авраамова. Иныи сказуют, яко наречеся Африка, аки бы Априка по толкованию Словенскому отверзтая; есть бо отворена и паче иных обращена к солнцу, образом же треугольна; от полунощи определяется морем Влоским, от запада и полудне Окианом, от Востока Чермным морем. Ту Египет, Ефиопия, Кафрария, страна Муринска, Мавритания, Нубия, Ливия, Варвария, и Царства Фессинское, Маррохинское, Моногумугов, Мономотапов, Адель, Конго и прочая.

О ЕВРОПЕ.

ЕВРОПА ЕСТЬ часть округа земнаго, яже в долготу идет от предела Португалии до реки Танаис или Дону; в широту же от Архипелага, сиречь междуземнаго моря до Окиана Гибернитскаго; содержит в себе преславныи и крепкии Государства, богатства, и велие множество людей храбрых, сильных и мудрых, и к обитанию есть здрава и добра; в ней Греция, Фракиа, идеже Константинополь; Таврика, идеже Татаре Перекопскии, Славяне, Русь, Москва, Польша, Литва, Мазовша, Жмудь, Курляндиа, Лифлянты