правило, иже в Никеи перваго собора, и 1-е и 2-е, иже в средце, собора, и 21-е, иже во Антиохии, собора такожде не повелевает.
Святаго Вселенскаго 1-го собора правило 15.
От града во град ни епископ, ни презвитер, ни диакон да не преходит. Понеже паки хотят обращени быти в церкви, в них же поставлени быша.
Толкование.
(л. 757 об.) [3185] Правило се не токмо епископом преступати от града во град отнюдь отрицает, но и презвитером и диаконом. И сотворшыя нечто таково, в свой град и в своя церкви, в них же поставлени быша, аки возвращати повелевает.
1-е же и 2-е правило собора, иже в средце, жесточае таковыя мучит, отставляя сих от святаго общения, и таковым епитимиами запрещает.
Святаго Антиохийскаго собора правило 13.
Аще никим же позван, ни умолен быв епископ, во иную область отшед, и поставит презвитера или диакона или правление (л. 758) [3186] некое церковное творит, такова нетверда и разрушена да пребудут, а он да извержется.
Толкование.
Многа правила обрящеши о сем, возбраняюща, еже не преходити епископу от своея области во иную и поставляти в ней презвитеры и диаконы или иное что епископское творити, токмо аще где позван будет, умолен от страны тоя епископа таковое что творити. Аще же от своего дому во иную область пришед, поставит презвитера или диакона или строению церковных вещей некое правления сотворит, нетвердым и разрушеным быти от него сотвореным и самаго изврещи правила повелевают.
(л. 758 об.) [3187] Того же святаго собора правило 16.
Иже кроме совершенаго собора, иже самаго митрополита, на праздный церкве престол наскочив, аще и сам есть празден, от епископии да будет извержен.
Толкование.
Празднаго убо епископа, не имущаго епископии, в праздную церковь, не имущую епископа, поставляти от совершенаго собора ту сущу митрополиту тоя области се правило повелевает, а не самому о себе престол восхищати, аще и от всех людей града того нудим есть, аще не хощет быти отвержен. Непраздному же епископу, имущему свою церковь, 21-е правило сего собора и другая различна, якоже (л. 759) [3188] в 14 апостолстем правиле писано есть, в другую церковь преити отнюдь не повелевает, но пребывати в церкви, в ней же исперва от Бога поставлен бысть.
Того же святаго собора правило 22.
Такоже, якоже и 13 правило сего собора, и се правило глаголет: Еже коемуждо епископу в своем пределе владати и поставляти презвитеры и диаконы, во ин же предел не ити, ни поставити презвитера, ни ино что епископское творити кроме [3189] воли епископа предела того. Аще же дерзнет и сотворит что таковое, да будет извержен и повинен и поставленый от него презвитер (л. 759 об.) [3190] или диакон.
Святаго Вселенскаго втораго собора правило 2.
Предел ради никто же да смешает церковь, ни поставляет ни презвитера, ни епископа. Сущия ж во языцех Божия церкви, святых отец обычай да держат.
Толкование.
Во многих правилех речено есть, яко не подобает епископу на чюждую епископия находити, но койждо внутрь своих пределов да пребывает и в своих пределех да поставляет епископ убо презвитеры и диаконы. Такоже и митрополит епископы своя во области своей, да не прескачет чрез пределы своя и церкви да не смятут. Сущия же во иноязыцех Божия (л. 760) [3191] церкви, яже во Египте и Ливи и в Пентаполии, древний обычай отеческий да держат, якоже 6-е правило 1-го Вселенскаго собора, иже в Никеи, повелевает.
Святаго 4-го Вселенскаго собора правило 5.
Преходящии из града во град, иже от них правилом повинни суть.
Толкование.
Речено есть в 13 правиле, иже во Антиохии, собора, яко не дерзнути епископу преити от своея области во иную и поставити презвитера или диакона без воли сущаго во области той епископа или что иное епископское творити правление. Аще бо и сотворит что таково, праздно и нетвердо да пребудет и той месть да приимет (л. 760 об.) [3192] своего безчиния, и извержен да будет от своего сана Святою Троицею. Тако бо и зде написаное правило повелевает.
Святаго Сардийскаго собора, еже есть в средце, 341, святых отец правило 1.
Не обрящется епископ, от мала града в велик пришед, иже убо от смиреннаго в высок прескочит, яко горд и лихоимец обрется, вся дни живота своего да будет без причащения.
Толкование.
Еже преходити епископом от града во град, сиречь оставиша свою епископию и иную взимати, се правило отнюдь таковому делу не повелевает быти. Но аще и будет, жесточае преходящыя [3193] мучит. (л. 761) [3194] Познавше убо святии отцы от сея вещи, яко ни един же епископ от великаго града в менший град тщится преити, но от мала града в вышний и болший град желает прескочити гордыни ради и лихоимства. Повелеша таковому ни с мирскими человеки равно причащения имети, но по извержении сана и причащениа отлучену быти.
Того ж собора правило 2.
Аще кто от града во град прешед и молвы творит, от народа приимая себе поборники, да глаголют, желаем и молимся, да будеши нам епископ, той ни на самой кончине не причастен.
Толкование.
Аще который епископ в толико шатание и неистовство пришед и дерзнет (л. 761 об.) [3195] просити и преити от града во град, глаголя: Яко хотят мене людие града того. И оттуду взем грамоту, показует написаное к нему от всех граждан моление, якоже дабы им епископ был. Еже яве есть, яко смышлением и хитростию таковое бысть, мало неких мздою и дары и честию возмогл привлещи к себе, да церкви ставше, молву сотворят, глаголюще велегласно, просяще имети того епископа. Таковаго убо яко зело смедша и таковое сотворша и познана бывша в том, велми святый сей собор осуди. Отрече бо тому ни во исходе от жития недостойну быти [3196] причащения и назна(л. 762)менана [3197]. Странно бо се и страшно есть, еже ни во исходе от жития не сподобитеся причащения, его же не обрящеши во всех правилех написана, о инех ни о коих же гресех такова запрещения.
Того ж собора правило 3.
Никоторый же епископ, не позван во град, да не приидет. И епископ с епископом, аще имать прю, чюжаго епископа да не призовет. Аще ли же ни, да судит Римский, ту будут чюждии.
Толкование.
В различных правилех речено есть, еже никому же дерзнути от своего предела во иную область преходити, аще не будет позван от области тоя митрополита и от сущих с ним епископ. Тожде убо и сей святый собор (л. 762 об.) [3198] повелевает. Но аще который епископ с другим епископом о некоей вещи распрю имать, и с ним да судится пред собором тоя области, в ней же есть, и не подобает от иныя области разума ради неких епископ призывати, но от единех тоя области епископ судитися. И аще неугоден ему будет суд и мнит, яко не по праву осужден быв, судивый его митрополит и епископи да возвестят Римскому Папе писанием вину и суд, како осудиша и. И аще не восхощет того суда, и той, или сам разсмотрив суд, аще право осужлен бысть, возвестит им писанием. (л. 763) [3199] Аще ли ни, тамо близ их сущая области епископом да повелит, да сотворше собор, судят ему паки второе.
Святаго 6-го Вселенскаго собора правило 20.
Епископ во инем граде в народе да не учит. Аще же обрящется, да престанет от епископства и презвитерская действует.
Толкование.
