Дерзновением [4005] посла Моисей послы от Кадис ко царю Едомску, яко да минет посреде земли его, (л. 1031) [4006] и не попусти, и уклонися от него Израиль.
Дерзостию [4007] вооружися Ханаан на Израиля и падоша, и наречеся имя месту тому пустошь. Дерзостию [4008] роптаху людие на Бога, и пусти Господь на люди змия уморяюща.
Дерзостию [4009] Сион царь Аморейский ста противу. Дерзновением Израиль того поби, и прочия.
Дерзостию [4010] воста Валак, царь Моавль на Израиля. И призва Валаама прокляти его, он же вместо клятвы словом Господним благослови его.
Дерзостию [4011] сынове Израилевы поклонишася и послужиша Веельфегору.
Дерзновением Моисей поби 24 000. Дерзостию израилтяне смесиша с мадиамляныни [4012].
(л. 1031 об.) [4013] Дерзновением Финеес взем сулицу, прободе израильтянина Смадия и устави гнев от сынов Израилевых. Дерзновением [4014] Иисус Наввин вниде в землю обетованную и прокля град Иерихон и все, елико в нем, злато и сребро и медь и железо освяти Господеви, в сокровище Господне да ся внесет. Дерзостию Ахар украде от возложеных Господеви ризу красну 200 дидрахм сребра [4015] и сосуд злат, 50 дидрахм и наведе гнев Божий на весь Израиль. Обличен быв, побиша его камением со всем родом и со скотом, и сожгоша его огнем.
Таковым [4016] дерзновением Иисус победи 31 царя. (л. 1032) [4017] Дерзостию [4018] сынове Израилевы сотвориша пред Господем и предаст я Господь в руку Мадиамлю. Дерзновением порази Гедеон с тремясты мужи Мадиама, Орива, и Зива, и Зевея [4019], и Салмана и вся князи их и с ним 120 000, иже реша, да наследим себе святилище Божие. Дерзостию [4020] и гордостию ят Саул священства сан на ся восхищ и сам возносяй всесожжение Господу. И бысть глагол Господень к Самуилу, глаголя: Раскаяхся, яко помаза Саула на царьство, понеже отвратися от Мене и словес Моих не соблюде. Дерзновением прииде Самуил к Саулу и обличи, и рече: Еда ли быша и угодны всесожжения и жертвы, но лучши есть послушати (л. 1032 об.) [4021] гласа Господня [4022] и уне есть жертвы благи послушание и паче тука овня, яко грех есть чарование, тако грех есть противление, яко грех есть идолопоклонение, тако грех есть преступати заповеди Господня, яко уничижил еси глаголы Господня и уничижит тя Господь, не быти тебе царю во Израили. И отврати лице свое Самуил, отъити хотя от него, и ят Саул за воскрылие риз его и раздра их. И рече ему Самуил [4023]: Отъя Господь царьство Израилево от руку твоею днесь и даст е ближнему твоему блажлишу тебе.
Дерзостию [4024] гоняй Саул Давида и отступи Дух Господень от Саула и давляше дух лукавый от Господа.
(л. 1033) [4025] Дерзновением Давид бежа от Саула, прииде в церковь ко Авимелеху иерею и хлебы предложения снесть, взят же и оружие Голияфово. Слышав [4026] же сия Саул от раба своего Доика Сирина, началника пастырем Саулим и пасутмски Саули.
Дерзостию посла Саул призвати Авимелеха, сына Ахитова, и вся сыны отца его, иерея от Помвы, и приидоша вси ко царю. И рече Саул: Послушай убо сыну Ахитов. Дерзновением рече иерей: Се аз, глаголи господине. И рече ему паки Саул дерзостию: Что помысли на мя ты и сын Иессеов, яко вда ему хлеб и копие и вопросил еси Бога ради его, положити его на мя врага до днешняго дне. (л. 1033 об.) [4027] И рече Авимелех со дерзновением царю: То кто есть во всех рабех твоих верен, якоже Давид и зять царев, и князь всем заповедем твоим, и славен в дому твоем? Или мниши днесь наченша мя молитися о нем к Богу? Ни убо, да не положиши царю на раба своего словес сих и на весь дом отца моего, яко не веде раб твой сего словесе ни мала, ни велика. И рече Саул дерзостию и гордостию: Смертию да умреши, Авимелех, ты и весь дом отца твоего. И рече Саул рыщущим пред ним и предстоящим пред ним: Приведите и избиете иерея Господня, яко рука их со Давидом и к сему разумевше, яко бежит Давид, (л. 1034) [4028] и не возвестиша во ушию мою.
Дерзновением не послушаша отроцы Саули возложити рук своих на сопротив иереом Божиим. Дерзостию рече Саул Доикови: Возвратився ты срящи иерея. И обратися Доик Сирин и уби иерея Господня в той день, 85 муж и вся, носящая ефуд. И Номват, град иерейский погуби усты оружия от мужеска полу и до женска, от отрок и до ссущих и телят и осел и овчат, и гонзе един сын Авимелехов, сына Ахитова, имя ему Авиафар.
Дерзостию [4029] гоняше паки второе по Давиде, и предаде его Господь в руце Давиду в вертепе, и отъят Давид воскрылие (л. 1034 об.) [4030] одеяла его, и не сотвори Саулу зда, еже убити его. И воста Саул, сниде на путь свой. И изыде Давид вослед из вертепа со дерзновением, и возопи Давид за ним, глаголя: Господи царю! И озреся Саул вослед его, и преклонься Давид до земли, и поклонися ему. И рече Давид к Саулу: Почто послушаеши словесе людий, глаглющих, яко се Давид ищет душа твоея? Се бо днесь видеста очи твои, яко предал тя бяше Господь в руце мои в вертепе, и не помыслих убити тебе, но помиловах тя. И виждь одеяла своего в руце моей, аз отъях воскрылие одеяла твоего и не убих тебе. И разумей и виждь днесь, яко несть (л. 1035) [4031] злобы в руце моей, ни безчестия, ни ненависти [4032], ниже согреших к тебе, а ты ищеши души моея изъяти ю. Да судит Господь между мною и тобою, и да оправдит мя Господь от тебе. Виждь, Господи, и суди судом ми, и отсуди мя от руки Твоея. И суди Господь за дерзость и гордость Саулу, елико неправдою пред Богом. И обложися сам священничества саном и жречествова, сугубо и елико иереов Господних поби и по Давиде гони, зле поживе, злее и погибе. Сам [4033] на свое оружие падше умре и с чады своима и со всем домом. И бысть Давид царствуяй [4034], и приим дерзновение, еже вознести киот Божий, а в нем же нарицается (л. 1035 об.) [4035] имя Господа силнаго, седящаго на херувимех. И дерзостию простер Озия руку свою на киот Божий придержати и ят зань, яко превращаше его телец. И разгневася Господь гневом на Озию, и порази и ту Господь. И умре от киота Господня пред Господем.
Дерзостию [4036] сотвори Давид прелюбодейство с Вирсавиею и убийство мужу ея Урию Хетфеянина. Дерзновением [4037] вниде Нафан пророк к Давиду и рече ему: Отвещай ми, царю, ныне суд. И рече ему: Два мужа беста во единем граде, един богат, а другий убог. И у богатаго стадо бяху и буи воли мнози зело, а у убогаго не бе ничто же, но токмо агница (л. 1036) [4038] едина мала, юже стяжа и устрои ю, и вскорми ю, и возрасте с ним и з сыном его вкупе, от хлеба его ядяше и от чаши его пияше, и на лоне его почиваше, и бе ему яко дщи. И прииде некто с пути к мужу богатому, и не восхоте пояти от стад своих и от буй волиц своих на сотворение обеду путнику, пришедшу к нему, но поят агницу убогаго и сотвори обед мужу, пришедшу к нему. И разгневася гневом зело Давид на мужа того, и рече Давид к Нафану: Жив Господь, яко достоин муж той смерти [4039], сотворивый то, и агницу возвратив седмерицею, понеже есть сотвори сице, и о нем же не восхоте. (л. 1036 об.) [4040] И рече Нафан ко Давиду: Ты еси человек, сотворивый се. Се же ти глаголет Господь Бог Израилев: Аз есмь помазах тя на царьство во Израили, Аз избавих тя от руки Сауловы и дах ти Господа твоего и жены господина твоего в лоно твое, и дах ти дом Израилев Июдин. Или ти мало то есть? Да приложу к сим и еще. И что яко оскверни слово Господне, еже сотвори лукавое пред очима Его? Урию бо Хетфеянина оружием уби и жену его поят себе в жену. И ныне не отступит оружие от дому твоего до века, зане уничижи мя. Сице глаголет Господь: Се Аз воставлю зло от дому твоего и раздам жены твоя пред очима твоима, (л. 1037) [4041] и дам ближним твоим и лягут со женами твоими пред солнцем сим. Яко ты сотвори втайне, и Аз сотворю глагол сей пред всем Израилем и пред солнцем сим.
Дерзновением Давид покляся пред Богом и рече Давид Нафану: Согреших ко Господу моему. И рече Нафан к Давиду: Господь отъят согрешение твое от тебе, не имаши умрети.
